Goierriko Hitza

Urola Laztik garaipenarekin ekin dio aurten denboraldi berriari

Eskubaloia ðð Hasieran atzetik jarri ziren UrolaLaztikoak baina atsedenaldiaren ondoren egoerari buelta eman zioten.

m.legarreta

Eskubaloian ere denboraldi berria hasi du Zumarragako taldea den Urola Laztik. Modu onean ekin dio gainera, irabazi egin baitzuen lehen partidua. Pulporen aurka jokatu zuten eta 25-28 gailendu ziren zumarragarrak.

Partida estua bien aldetik

Hasiera aldera bi taldeak berdintsu ibili ziren eta zaila izan zen aurkariari alde pixkabat ateratzea. Atsedenaldia iristean Pulpo taldea aurretik zihoan markagailuan. Izan ere, Urolak zenbait hutsune izan zituen defentsan eta huts egiteak ere egin zituen aurkarien atezainaren aurrean.

Bigarren zatian, berriz, aurretik egindako akatsak hartu zituzten kontuan eta atzelarien arteko jokoa egokitu zuten. Horri esker, bost minutu eskaxetan partidua berdintzea lortu zuten. Ondoren, gol baten aldea atera zieten Pulpo taldekoei, eta partidua amaitzeko bost minutu falta zirela bi puntu gehiago zituzten markagailuan. Azkeneko txanpan, berriz, bukaerako emaitzak islatzen duen 25-28a lortu zuten.

Iñigo Canteroren arabera «zaila izan zen partidua aurrera ateratzea. Horrek esan nahi du liga hau oso parekatua izango dela. Pixkanaka-pixkanaka lehiaren erritmoan sartzea espero dugu».

Gazteetan denetarik

Jubenilek ere garaipena lortu zuten Hondarribiaren aurka. Kadeteek, aldiz, galdu egin zuten 31-16 Leizaranen kontra.