Goierriko Hitza

Lizarrustiko parketxeak ibilaldi tematikoa antolatu du iganderako

Gaintza Gaintzako plazatik irtengo dira 8:30ean, eta historian zehar paisaiak izan duen bilakaera aztertuko dute.

e. imaz

Lizarrustiko Parketxeak urtarrileko ibilaldi tematikoa du antolatuta iganderako, Baserri eremuen biziraupena ezbaian: paisaia, bizimoldea, lana, etorkizuna lelopean. Ekimenaren baitan hainbat ekitaldi eginak dituzte ja hil honetan, eta iganderako ibilaldi bat egitea proposatu dute. Ez litzateke nolanahiko ibilaldia izango, ordea. Historian zehar paisaiaren bilakaera aztertzeko ibilaldi bat litzateke. Gaintzan hasi eta handik Larraitzerako bidea hartuko dute, Larraiztik Abaltzisketara joango dira eta handik berriz ere Gaintzara.

Antolatzaileen hitzetan «paisaia herri baten identitatearen parte da, herritarrok gure herriarengan dugun ezagutza eta adeikortasunaren seinale. Hala ere, egun ezagutzen dugun paisaia ez da beti horrelakoa izan. Historian zehar paisaiak izan duen bilakaera aztertuko da ibilaldiaren bitartez». Ibilbidea oinez egiteko samurra dela argitu dute. Ibilitako parajeetan barrena ager daitezkeen antzinako paisaiaren aztarnak aztertuko dituzte eta aztarna horiek baliabide naturalen ustiapenari buruz ematen duten informazioaz hitz egingo dute, tokian bertan.

Igandean 08:30ean irtengo dira Gaintzako plazatik.